Eurodesk i Europa

• Kan eg halde fram med å ta fiolintimar mens eg skal studere medisin i Polen?
• Kan sambuaren min vere med og i tillegg drive med frivillig arbeid eller få seg ein jobb der?
• Eg vil gjerne vere trainee i eit europeisk land, men kvar finn eg tilbod?
• Kor mykje må eg rekne med å betale for ein hybel i Budapest?
• Finst det internasjonale program eg kan vere med i, der eg kan møte ungdommar som er interesserte i det same som meg?

Eurodesk kan gi deg svaret på mykje! Veit me det ikkje sjølve, formidlar me vidare til kollegaer i andre land, eller til samarbeidspartnarane våre i Noreg! Du kan også kontakte ein lokal Eurodesk-partnar direkte.

Eurodesk-nettverket informerer om internasjonale moglegheiter til ungdom i 36 europeiske land.

Lokalkontaktane i Eurodesk-nettverket er spreidde utover heile Europa, og dei kan gi detaljert informasjon om moglegheitene som finst i områda dei held til i.

På eurodesk.eu finn du eit kart med alle tilknytte lokalkontaktar.

Gå inn og ta ein kikk!

Eurodesk har utvikla ein «Opportunity Finder». Denne kan ungdom og dei som jobbar med ungdom, bruke til å finne aktuelle og relevante tilbod.

Tilboda er sorterte i kategoriane learning, volunteering, internships, participating og grants.

Alle medlemmane i nettverket er med på å oppdatere denne databasen, slik at det stadig kjem nye, spanande tilbod.

Du kan også spørje oss direkte, så skal me saman med nettverket prøve å finne fram til moglegheiter som passar for deg.

Eurodesk er ein del av Erasmus+, som er EU sitt program for utdanning, opplæring, ungdom og idrett. Programmet er delt inn i ei rekkje støtteordningar på dei ulike felta og rettar seg mot ulike målgrupper.

Lær meir om programmet og finn ut kva moglegheiter det gir deg.

Kvart år i oktober går Eurodesk-kontaktane saman om kampanjen Time to Move.

I 2019 var det 1100 arrangement i 31 land for å skape merksemd om alle former for internasjonal mobilitet på ungdomsfeltet.

Lokalkontaktar for Eurodesk i Noreg kan søkje om midlar frå oss for å gjennomføre informasjonstiltak om moglegheiter for ungdommar i utlandet. I 2019 organiserte 5 lokalkontaktar totalt 17 informasjonsarrangement i ulike byar i Noreg i løpet av kampanjen.